حلويات العيد واحلى من الجاهز كمان

بسم الله الرحمن الرحيم

احبتى اعضاء منتدى كنوز الحياة

اقدم لكم سر من اسرار نجاح حلويات العيد

الحمد لله مقادير مظبوطه ونصائح غاليه

اتنمى ان تنال اعجابكم

فى مصر كحك وبتيفور والغريبه مش فى العيد وبس  كمان كل عروسه جديده بنحتفل بيها  بنعمل لها كحك عيد

نيجى بقى لاهم خطوه وهى  المقادير


ملحوظة بالنسبة للكحك

 -1-عشان الكعك يكون ناعم لا زم نبسه كويس قوى وماء العجن مايكونش كتير
لأن المياة الزائدة هى اللى بتنشفة و فية ناس كتير فاهمة العكس
ان كل ما تحطيله ماء يبقى ناعم وطرى و يستغربوا لما يحطوا ماء و يطلع ناشف.
 -2- ابقى حطى السمسم ابيض ورشية على وش الدقيق فلما تيجى
تصبى السمن المقدوح قوى حينزل على السمسم يحمصة.
 -3- لما تخلصى الكحك وتحطية فى الصاجات علشان يخمر
لما تلاقى الكحكة نشفت تعرفى انها خمرت .
4- - ماتتقيديش بمقدار الدقيق اللى مكتوب لان نوعه بيختلف
من دقيق للتانى يعنى ممكن ماتستعمليش الكمية المكتوبة كلها
وممكن تحتاجى تضيفى دقيق تانى
 -5-بنستخدم لكل كيلو دقيق علية كوب ماء او كوب ونص ماء
لحد ماتلاقى العجينة طرية واتلمت .
 -6- لما تيجى تنقشى الكحك بالمنقاش وانتى بتنقشى ابقى اضغطى على النقش وارفعى
ايدك بالنقشة لفوق علشان السكر البودرة يبقى ثابت جوة النقشة
-7-  بنستخدم ملعقة خميرة فورية لكل 4 كوب سميد.
**************************
*طريقة استخدام الخميرة بيرة :
فى كوب نضع ملعقة صغيرة خميرة بيرة وقليل من السكر وندوبها بالملعقة الأول
ثم أضع كوب ماء دافىء .
 
 
ملحوظة بالنسبة للغريبه


 -1-عجينة الغريبة لازم تاخد دعك جامد
 -2-كل ماتدعك كويس بتطرىوماتظهرش فيها التشققات بعد السوى
 - 3-اذا ذاد السكر فى عجينة الغريبة بتنشف الغريبة علشان كدة بنقلل السكر شوية فى العجينة ولما بتخرج من الفرن وهى ساخنة بنرش عليها بسرعة بالمنخل 
 
 
ملحوظة بالنسبة للبتيفور

-1- اذا كنتى عاوزة البتيفور ناعم قوى اعملية بصفار البيض فقط
-2- فى عمل البتيفور لاتدهن الصينية بالسمن
-3- لو أردنا عمل بيتي فور بالكاكاو نضيف للدقيق2 ملعقة كاكاو وننقص2 ملعقة دقيق منه 
 
خامات التزوييق
شوكولاتة فارمسيل – جوزهند ناعم – جوزهند خشن – الوان صحية – شيكولاتة سايحة بيضاء – شيكولاتة سايحة غامقة – كرز مسكر – فواكة مسكرة – كور البونبون الفضى – قشور اللوز – مكسرات مفرية – قرنفل صحيح – فستق – ملبس ملون – صنوبر – مربى – حلوى الماء
 
كحك العيد بالخميرة الفورية


‏ كيلو دقيق‏ -500جرام سمن
‏ كوب حليب دافئ - 2‏ ملعقة صغيرة خميرة فورية‏
2‏ ملعقة صغيرة رائحة كعك‏
‏2 ملعقة كبيرة سمسم
ذرة ملح
 
 
‏الطريقة

ننخل الدقيق في طبق غويط للعجن ورائحة الكحك..
نعمل حفره في النص نضع فيها السمسم
نقدح السمنه علي النار لغاية ما تتقدح كويس جدا
نحطها علي السمسم ونقلب بملعقه خشب او بالمقصوصة
لماتبرد نبس أو نفرك خليط الكعك بين الإيدين كويس قوي ..
حتي ينعم ويتشبع بالسمنه
-نخمر الخميره مع ملعقه صغيره سكر في شوية ماء دافئ
بعد أن تعلو وترتفع الخميره .. نعجن بيها الكحك . ونضيف لبن دافئ حسب العجن. ونغطيها لتخمر حوالي ساعه
نشكل الكحك كور صغيره ونحشيها إما بالعجميه أوالملبن أوأي نوع مكسرات مفضل
أو حتي بدون حشو وننقشها بالمنقاش أو القوالب الخاصه بالكحك..
نخبزها ولما تبرد نرش عليها سكر بودره
 
بتى فور ناعم


1/4 1كيلو دقيق
 3/4 كيلو زبدة
1/4 كيلو سكر بودرة
7صفار بيض + 1 بيضة كاملة
فانيليا
ربع معلقة بيكنج بودر
الطريقة
نضرب الزبدة كويس جدا لحد متنعم باليد فقط
ثم يضاف لها السكرونستمر فى الضرب لحد ماتبيض
يضاف البيض والفانيليا الى الزبدة والسكروتدعك جيدا جدا
بإستعمال اليد نعجن بالدقيق المضاف له البيكنج بودر
نشكل البيتي فورا بالقمع على هيئة وردات مدورة او وردات بالطول
او بالماكينة ويخبز في الحال
-لو أردنا عمل بيتي فور بالكاكاو نضيف للدقيق2 ملعقة كاكاو
و ننقص 2ملعقة دقيق منه
بعد ما يطلع ويبرد نزوقة بأفكار كتير زى مثلا نلزق
واحدة الشيكولاته مع واحدة بيضاء او نلزق كل اتنين ابيض مع
بعض ونزوقهم بالشيكولاتة السايحة او نلزق اتنين بالشيكولاتة ونزوقهم
بالشيكولاتة البيضاء
 
السابلية (بالكيلو)
*************


1/2 كيلو سمن
3/4 كيلو دقيق
2 بيضة – فانيليا
فنجان شاى سكر بودرة
معلقة صغيرة بيكنج بودر

الطريقة
يضرب السمن جيدا ويضاف اليها السكر ونستمر فى الضرب
يضاف البيض و الفانيليا
نضع البيكنج بودر على الدقيق نضيف الدقيق مع العجن بالايد
لحد ما تتكون عندك عجينة صالحة للتشكيل
نرش امامنا على الترابيزة دقيق و افرد العجينة بالنشابة
بتخانة 1/2 سم تقريبا وابدء بتقطيعها بقطاعة مدورة
او بكوب صغير من بتوع القهوة مش بتاع الشاى
ادهن صينية بالفرشاة بالسمن و ارصص فيها الدوائر
ادخلها الفرن متوسط الحرارة لحد ما تستوى
و دة فى حدود ربع ساعة لما تطلع اسيبها تبرد خالص
ملحوظة قبل الزواق النهائى :
ممكن نعمل نص العجينة ابيض زى ما هيا و نعمل النص التانى
بأضافة  الكاكاو عليها عشان يبقى بالشيكولاتة وكدة ممكن
نلزق واحدة ببضاء مع واحدة بنى (حسب ما بتحبى)
2- ممكن بعد ما نفرد العجينة بالنشابة و نقطعها دوائر نسيب نصهم
سليم زى ما هما و النص التانى
نخرمة بالنص بقطاعة تانية صغيرة (مثل كستبان الخياطة (
ونلزق واحدة سليمة بواحدة مخرومة
نبدأ بعملية اللزق بالمربى ممكن نلزق واحدة سادة بواحدة بالشيكولاتة
وممكن نلزق اتنين بيض مع بعض
وممكن نلزق اتنين بالشيكولاتة مع بعض
وممكن نحط معلقة مربى على واحدة مقفولة و نلزق فوقها واحدة
مخرومة نلعب بالزواق زى مانتى عايزة
وممكن نحط بصابعنا مربى على طروف السابلية داير ما يدور
وننغطسها فى المكسرات او الشيكولاتة الفارمسل
و ممكن بعد ما نزوب السيكولاتة الخام نحط المعلقة فيها
و ننزل منها سرسوب رفيع يعمل اشكال على وش السابلية
 


بسكويت الفانيليا


المقادير
650جرام زبدة جامدة
6كوب دقيق
صفار 4 بيضات
معلقة صغيرة فانيليا
كوب  وربع سكر بودرة
الطريقة :
ننخل الدقيق و نحط علية 3/4 كمية السكر
نضع الزبدة على الدقيق و نخلطهم كويس مع بعض لحد ما تشعرى ان
الدقيق كله بقى فية زبدة نضرب بالشوكة صفار البيض
مع الفانيليا ونضعهم على خليط الدقيق و نعجنهم كويس قوى
بأيدنا وبسرعة علشان حرارة ايدك ما تزوبش الزبدة
غطى العجينة بكيس نايلون و حطيها فى الثلاجة 3 ساعات
تطلعيها من الثلاجة و تفرديها بالنشابة و تشكليها زى ما انتى عاوزة
بقطاعة البسكوت او تعملى صوابع صغيرة و تلفيها على هيئة هلال او
على هيئة دوائر و تضعيه فى صينية مدهونة خفيف وتدخلية فى فرن
متوسط الحرارة لحد ما تلاقى لونة بقى اصفر دهبى علشان ما ينشفش منك
و تقريبا حوالى 10 دقائق لما يطلع من الفرن
وهو ساخن رشى علية بالمنخل باقى السكر اللى احنا شايلينة ( الربع كوب(
 
بسكويت السويسرول


المقادير:
كوب زبدة طرية
ثلاثة أرباع كوب سكر
بيضة
2 كوب ونصف دقيق
نصف ملعقة صغيرة فانيليا
نصف ملعقة صغيرة بيكنج بودر
ملعقة صغيرة بودرة كاكاو.

الطريقة :
اضربى الزبدة في الخلاط حتى يصبح لونها ابيض
ثم اضيفي لها السكر والبيضة والفانيليا واضربى جيدا
اثناء ذلك اخلطي الدقيق مع البيكنج باودر ثم اضيفيه الى الخلاط بالتدريج
حتى تتكون عجينة متماسكة خذي العجينه وضعيها في الثلاجة لمدة 10 دقائق.
اقسمي العجينة الى قسمين: قسم اتركيه جانبا
والقسم الآخر اضيفي له الكاكاو واعجنيه مرة أخرى
افردي العجينة الأولى على شكل مستطيل وافردي العجينة الثانية على شكل مستطيل
واخيرا ضعي الثانية على الأولي ولفيها مثل السويس رول
ثم قطعيها دوائر رفيعة.
رصصى البسكويت في صينية مدهونة وادخليها فرن متوسط الحرارة لمدة ربع ساعة


الغريبة


1 كيلو دقيق
1/2 كوب سكر ناعم
500جرام زبدة جامدة
1 بياض بيضه
فانيليا
1 ملعقة بكنج بودر صغيرة

الطريقة
نضرب السمن الاول لوحدة كويس
نضع علية السكر ونضربهم كويس مع بعض لحد ما يبقوا
زى الكريمة و لونهم يبقى ابيض نضع عليهم البيضة و الفانيليا
نضع البيكنج بودر على الدقيق و نضع الدقيق شوية شوية على
الخليط السابق الى ان تتكون عندنا العجينة
نشكلها على هيئة كور صغيرة ونضع فى منتصف كل كرة اما قرنفلة تنغزيها
فى العجينة مش حيبقى باين منها الا الوردة اللى فوق – او نص فستقة –
او نص لوزة مقشرة – او ملبسة فضى اللى بتبقى مدورة زى الكرة و ناشفة
و لونها فضى - او واحدة صنوبر
نرصص الغريبة فى الصوانى و ندخلها الفرن و خلى بالك ان لونها مش
حيتغير انتى ابقى بصى عليها من تحت حتلاقيها لونها اغمق شوية
و مسك نفسة كدة خلاص تخرجيها من الفرن
 
القراقيش


القراقيش- أو كما ننطقها أرا إيش- عادة نعملها في عيد الفطر مع الكحك
وهذا الصنف ممكن التغير في مقاديره حسب رغبة المتذوقين بمعنى أننا ممكن أن نزيد مثلا من السمن إذا أردنا أن تكون القراقيش ناعمة وممكن العكس إذا كنا نحبها غير ذلك
وممكن أيضا زيادة الملح قليلا بها وأيضا ممكن إضافة توابل أخرى زيادة عن ما سأذكره ولكن هنا سأكتب لكن المقادير المعتادة

المقادير
-----

1كيلو دقيق
(2\1-1) كوب سمن (375 جرام )
ملعقة صغيرة ملح
ملعقة صغيرة من كل من الأتي--> شمر , يانسون , حبة البركة
ملعقة كبيرة سمسم
ملعقة كبيرة ممسوحة خميرة فورية
ماء دافىء+ قليل من الحليب السائل للعجن (تقريبا 2\1-1 كوب)قد يزيد قليلاً

الطريقة
ينخل الدقيق ونخلط معه الملح ثم نعمل حفرة بسيطة بوسط الدقيق ونضع بها التوابل والسمسم

نسخن السمن يحيث لووضعناه على الدقيق نجده يفور بشرط ألا نحرق السمن أو يظهر منه الدخان
كما فعلنا مع كحك العيد
وعندما يسخن السمن نضعه على السمسم والتوابل والدقيق
ولكن نظراً لأن كمية السمن هنا أقل من الكحك فسنجد الشكل مختلف
نبس الدقيق باليد كما في الصور -إما بين راحتي اليدين أو بيد واحدة حسب الأسهل بالنسبة لكل واحدة

نضع الخميرة والماء حبة حبة ونعجن جيدا
نترك العجينة ترتاح ربع ساعة
نبدأ بتشكيلها فوق سطح أملس( رخامة أو صينية ميلامين كبيرة )
نأخذ قطعة من العجينة ونبرمها كما في الصور ثم نبططها باليد ثم نقطعها مع ميل خفيف أو حسب الرغبة
وممكن تقطيعها بالسكين أو بأدوات التقطيع المختلفة






ترص في الصواني (الصينية لاتدهن بالسمن)
وتترك لمدة ساعة تقريباً لتخمر وهذا يتوقف على نوع الخميرة المستعملة وأيضا على درجة حرارة الجو
ثم تخبز لمدة 20 دقيقة تقريبا
وأنا أضعها في الرف السفلي أولا لمدة 10 دقائق ثم الرف الأعلى 10 دقائق أخري حتى لاتحترق وفي نفس الوقت يحمر وجهها وتصبح مقرمشة